az en ru
  Xəbərlər
«Üçüncü günün adamı» filminin mətbuat nümayişi

 24 iyun 2017

«Azərbaycanfilm» kinostudiyası «Üçüncü günün adamı» filminin mətbuat nümayəndələri üçün xüsusi nümayişini təşkil etdi. Filmin nümayişindən əvvəl kinostudiyasının direktoru Müşfiq Hətəmov bildirdi ki, yeni filmlərin təqdimatından əvvəl jurnalistlər üçün qapalı nümayişlər keçiriləcək: “Biz, “Azərbaycanfilm” kinostudiyası olaraq, mətbuat nümayəndələri ilə daha yaxından əməkdaşlığın tərəfdarıyıq. Son illərdə çəkilən filmlər haqqında ictimaiyyəti məlumatlandırmaq üçün medianın dəstəyinə ehtiyacımız var. Eyni zamanda, kinoda olan bütün problemləri mətbuatla açıq müzakirə etməyə hazırıq. Arzu edirik ki, jurnalistlər yeni filmləri qiymətləndirsin və tamaşaçı cəlb etməkdə bizə köməklik göstərsin”. 

“Üçüncü günün adamı” filmi Mədəniyyət və Turizm Nazirliyinin dəstəyi ilə Cəfər Cabbarlı adına “Azərbaycanfilm” kinostudiyasında lentə alınıb. Ekran əsərinin qala təqdimatı iyunun 30-da, saat 19:00-da Nizami Kino Mərkəzində keçiriləcək. 

Film Qarabağ mövzusundadır. Uzunmüddətli cəzaya məhkum edilmiş filmin qəhrəmanı azadlığa çıxdıqda yaxınları dünyadan köçmüş, doğma rayonu işğal edilmiş olur. Təsadüf nəticəsində tanış olduğu həmyerlisi ilə birlikdə təmas xəttini keçərək Kəlbəcərdə kəndinə gedib çıxan qəhrəman, nəhayət öz arzusuna çatır – doğma evini ziyarət edə bilir...

Filmin ssenari müəllifi Maqsud Qarayşa, quruluşçu rejissoru Babək Şirinsifət, quruluşçu operatoru Rafiq Quliyev, quruluşçu rəssamları Rafiq Nəsirov, Arif Niftiyev, bəstəkarı Firudin Allahverdi, icraçı prodüserləri Tərlan Babayev, Arif Səfərov, prodüseri Müşfiq Hətəmovdur.

Filmdə baş rolları Hikmət Rəhimov, Rasim Cəfərov, Kamran Ağabalayev, Nicat Həbibov, Vidadi Əliyev, Mehriban Zəki, Mətanət Abbasova, Xalidə Quliyeva, Zarina Qurbanova, Məmməd Səfa və Ayşad Məmmədov canlandırırlar.